أسعارك تزيدها حرارة
عم يا بتاع التجارة.. يا بقال
ماتقولى إيه العبارة وليه عمال
يوماتى تغلّى عليّا أسعارك
طب قولى منين أعشى العيال
عم يا بتاع التجارة.. يا خضرواتى
خضارك أد ايه مهم ف حياتى
بس شكلى بأسعارك دى
بكره هشتهى الطبيخ أنا ومراتى
عم يا بتاع التجارة.. يا فكهانى
فاكهتك شكلها حلو وعجبانى
بس بسبب أسعارك مابشتريهاش
وبدقها لمّا بتزرنى جيرانى
عم يا بتاع التجارة.. يا جزار
لحمتك حمرا حلوة وهيطق منها الحمار
بتمنى يجى اليوم وترخصهالى
وأشوفها بتغلى ف بيتنا ع النار
عم يا بتاع التجارة.. اعملى خاطر
وبلاش تستغلنى وتعمل عليّا شاطر
ويا ريتك لو ترخص أسعارك شوية
لأنى عليها ما عدتش قادر
ل/ رامى محمد زين
[ندعوك للتسجيل في المنتدى أو التعريف بنفسك لمعاينة هذه الصورة] 
موضوع: عم يا بتاع التجارة ..! 
