وثائق ويكليكس التعبيرية | وثيقة الحزب الوطنى للإعداد لإنتخابات برطمان 2010

وثائق ويكليكس التعبيرية | وثيقة الحزب الوطنى للإعداد لإنتخابات برطمان 2010

---

ننفرد بنشر ترجمة نص الوثيقة الأولى من وثائق ويكيليكس
و التى جرى تسريبها من محضر اجتماعات للحزب الوطني الديمقراطي قبل انتخابات مجلس الشعب 28 نوفمبر 2010


الوثيقة رقم
خ. م - 73635-2010

الحزب الوطني الديمقراطي - القاهرة
انتخابات مجلس الشعب 2010

الموضوع :
لقاء بين السيد المهندس أحمد عز أمين التنظيم بالحزب الوطني
, د. على الدين هلال أمين الإعلام و التثقيف
السيد صفوت الشريف الأمين العام للحزب الوطني و رئيس مجلس الشورى
الدكتور احمد فتحي سرور رئيس مجلس الشعب

د. محمد كمال عضو لجنة السياسات - امانة الإعلام

التصنيف :
سرى للغاية- للإطلاع فقط

تفريغ ملخص ما جاء محضر اجتماع 1 نوفمبر 2010

ملخص الاجتماع :

تمت المقابلة فى 1 نوفمبر 2010 بين المذكور اسمائهم أعلاه
و كان موضوع المقابلة هو استعراض وجهات النظر بخصوص
مراجعة الخطة النهائية للسيطرة الكاملة على مجلس الشعب 2010 بأقل نسبة
من الاضرار و بشكل سهل و ميسور للحزب الوطني لأهمية المرحلة القادمة

التفاصيل:

1- قال السيد صفوت الشريف :
القيادة السياسية عاوزة برلمان مخصوص للمرحلة الجاية
.. انا معنديش اي استعداد مثلا انى شوف جمال مبارك و هو بيحلف اليمين فى مجلس الشعب
و الاقي فجأة 100 نائب منسحب او بيعملوا هرجلة ! او حتى ساكتين بس رافعين يفط لا للتوريث !!
و تنقلها الفضائيات بقى و الجزيرة و البى بي سي و تبقى فضيحة
ده احنا ساعتها هنتعلق كلنا على باب القصر

2- قال أحمد عز :
يا أخى أصلا احنا فى الحزب زهقنا خلاص من قرف ال 100 نائب بتوع المعارضة دول
و انا نفسى خلاص فاض بيا الكيل
خصوصا ان حضورهم بانتظام كان بيجبر نواب الوطني يسيبوا مصالحهم و اشغالهم
و يحضروا جلسات مجلس الشعب !!!! تخيل ؟؟؟

هما فاهمين ان عضو مجلس الشعب لازم يحضر الجلسات كلها ؟ ده ايه المسخرة دي ؟
و المشكلة ان عددهم ك 100 نائب كان بيجبر على الاقل 200 نائب وطني من عندي انهم يحضروا و بالعافية
و فيه اللي كان بييجي من سفر و طبعا حسابهم و اكلهم و شربهم على قفايا بقى فى الفنادق
و ياريته جه بفايدة
ده فيه قانون فى مرة صغير كدة فى المرور كان عدد حضور الاخوان و المستقلين 90 و عدد حضور الوطني 56 من الغياب
و كان هيمر اغلبية لولا الدكتور سرور الله يكرمه لما عد الأصوات معجبوش الوضع طبعا فأجل المناقشة للجلسة المسائية !!!

3- أحمد فتحي سرور قال :
ايوة ده صحيح !!!

4 - أحمد عز قال :
طب ده من كتر الزهق اللي بقى فى الحزب عندنا منهم
انا وصلنى ان نائب وطني فى البهو الفرعوني بتاع المجلس
فى مرة قال لنائب اخواني متغاظ : انتوا ايه يا أخى ؟
مبتزهقوش ؟؟
ما وراكوش حاجة غير المجلس ؟
ماوراكوش اراضى تسقعوها ؟ فدادين تبيعوها ؟ طب زرع تشوفوا اخباره ايه ؟؟؟
انتوا داخلين المجلس علشان جلسات بجد ؟؟
جتكم خيبة !! !!
و قاعدين و مذنبيننا معاكم
جلسات مسائية و صباحية و ظهر
... اييييييه ارحمونا اهالينا شوية
سيبونا ناكل عيش بقى.. كفاااااااية !!!

5 - قال أحمد فتحى سرور :
و مين سمعك يا عز ؟
ما انا كمان زهقت من قرف المعارضة
.. حاجة تقرف
تخيل يا محترم ان كل قانون لازم اقعد اسمع 100 رأي معارض على الأقل !!!
و شوف انته بقى لو اقعد ادي لكل واحد منهم دقيقة بس يتكلم فيها ع الاقل و يقول رأي معارض للقانون !!!!
يعنى 100 دقيقة بالمستريح كدة
و طبعا لازم ادي زيهم 200 دقيقة للوطني على الاقل علشان يبان ان الرأي بالاغلبية فى الكلام عشان يبان الرأي الاغلب
يعنى القانون بياخد 300 دقيقة
يعنى خمس ساعات !!!
فين ايام ما كنا بنعمل خمس قوانين فى جلسة واحدة ساعتين و الدنيا كانت ماشية زي السكينة فى الحلاوة كدة

6- صفوت الشريف قال :
ده غير القرف بتاعهم اللي كانوا بيقرفوه لنظيف بيه اثناء عرض انجازات الحكومة فى مجلس الشعب
لدرجة ان الراجل من كتر قرفه منهم كان بيناقش و بيلقى كلمته
وهو بيبص بعيد عنهم و مطنشهم و مركز بصته على منطقة الوطني بس !!!

7- أحمد فتحي سرور :
ده غير قرف انسحابهم كل شوية ... منظر عار عار كان بيخلى شكلي زفت لما بأسافر برة !

8- أحمد عز :
و نسينا كمان منافستهم فى الخدمة فى دوايرهم
يعنى مثلا كانوا بيجبرونا فى السنوات اللي فاتت اننا لأول مرة نطلع قوافل صحية ردا على قوافل نوابهم
يعنى كانوا مكلفينا جامد ولاد الجزمة

9 - على الدين هلال قال :
عموما فحسب الخطة الموضوعة بعناية فائقة هتكون نسبة المعارضة سهل السيطرة عليها فى اي وقت كدة
الوفد صدق حكاية الصفقة و اننا هنديله من حصة الاخوان
.. حتة اللحمة خلت الكلب يجرى وراها بنجاح تام
و كدة حكاية المقاطعة اتلغت تماما
فى ذات الوقت اللي احنا مجهزين خطة منوعة بحيث ما يكونش فيه اسلوب واحد
يعنى فى دواير هتكون بالتسويد و فيه دواير هنقفل لجان و فيه دواير هتتضبط من فوق بمحاضر فرز نهائية جاية جاهز
و فيه دوائر هتتضبط لخبطة روتينية و هكذا بحيث يكون فيه و فيه
تشكيلة مضبطينها احنا و اللجنة العليا فى جيبنا و حبابينا هيغطوا علينا هناك

10- أحمد فتحي سرور قال :
هو نسبة المعارضة احنا هنضبطها على كام فى المجلس ؟

11- محمد كمال قال :
مش هيزيدوا على العشرة فى أفضل الاحوال و ممكن نخليها عشرين لو الرأي العام زمزأ شوية

12 - أحمد فتحي سرور قال :
لا عشرة يبقوا معقولين جدا
سهل السيطرة عليهم و ممكن تقلشهم كمان ساعة الجد بأي حجة
يعنى ... ده منع من حضور جلسات
.. وده رفع حصانة .. و ده يتذنب وشه للحيطة
... و ده يحط ايده على بقه و احنا بنناقش القانون !!!

13 - أحمد عز قال :
اهم شيء ما يكونوش العشرة دول ناس بارزة
لانهم ساعتها التركيز عليهم هيكون اضخم اعلاميا هنا
لهذا أسماء زي حمدين صباحي او جميلة اسماعيل او منير فخري عبد النور او جمال زهران او محمد العمدة او سعد عبود
كل دول لازم يتشالوا
صحيح هتكون فيها مفرمة و هتعملنا مشاكل فى منظرنا
لكن مافيش حل غير كدة

14 - أحمد فتحي سرور :
كدة خلصنا الخطوط النهائية تمام قوي
الموافق على قفل باب المناقشة و الانتقال للبوفيه
يتفضل برفع يده
هاه هاه هاه هاه هاه هاااااي
!! موافقة