الانتخابات فى مصر
حاجة كدا فوق الوصف
معجزة العصر وكل عصر
كل اللى بيتكلموا
...
ويقولوا ان فية تزوير
أنا بقولهم ولا كلمة ولا حرف
أنتم الا عندكم نقص
وأنا من هنا بقول المفروض
كل بلاد الدنيا والاخرة يتعلموا
ويستفدوا ولو لجزء بسيط
ويأخدوا لو نقطة من محيط
من النزاهة والشفافية
ويتعلموا شوية مننا الحرية
هما نسوا اننا مهد الحضارات
هما نسوا اننا بلد النيل
والحزب الوطنى والاهرمات
احنا اللى بندوا دروس للعالم فى الديمقراطية
طيب أنا راضى ضميركم
شوفتوا اموات بيحضروا انتخابات
الا فى مصر
علشان تعرفوا اننا ارض الحريات اللى بجد
والحرية عندنا تفوق الحد
ياريت كل واحد يخلى عند اهلة دم
ويعرف ان الحزب هو اللى شايل الهم
كل واحد لسانه طويل لازم يتقص
الناس دى مش عارفة قيمة مصر
لا والغريب ان فية ناس بتطالب برقابة دولية
بالذمة دة اسمه كلام هيجوا يرقبوا اية
هو احنا ياناس عندنا انتخابات
احنا عندنا مسرحية
بقالها خمسين سنة
بتتعرض على مسرح الدولة
والابطال هية هية
شوفتوا الصناديق المتعبية
بكامل الحرية والديمقراطية
وبكل نزاهة وشفافية الا فى مصر
من قبل الانتخابات مستنية لحظة الحسم
علشان ميبقاش فيه زحمه ووش
وغير كدا الانتخابات عندنا لها شكل ولون
اصحى للون اوعى تحط فى بالك لو خدت
حتى اصوات التمانين مليون
اوعى تفكر ان الانتخابات عندنا بأصوات الناخبين
الانتخابات عندنا مش محتاجة اكتر من مكالمة تليفون
الانتخابات فى العالم بتبقى ما بين اطراف
احنا عدينا المرحلة دى خلاص
هو طرف واحد وخلاص
هو اللى على ايديه الخلاص
هما اصحاب البلد انما
احنا وجودنا ملوش اساس
الشاعر
عبد الحميد بدوى
موضوع: الانتخابات فى مصر 
