غلاء المهور قضيه اليوم

،
بسم الله الرحمن الرحيم

السلام عليكم ورحمة الله وبركاته

صبآحكم / مسآكم رضى ومغفرة من الله تبارك وتعالى سبحانه

،

أم أحمد: أم صآلح بشري عسى صآلح اقتنع بفكرة العرس

أم صآلح: والله وأنا اخيتس من فترة وهو نشب بحلقي يبي يعرس بس تعرفين الوقت الحين تغير

قبل كانوا الناس يبون يسترون على بناتهم ويزوجونهن اللي يستآهلهن ومابوه تكاليف تقص الظهر

وبنآتٍ سنعآت بنآت رجآلٍ آجاويد تعرفين انهن ليا تزوجن أنو ولدتس بخير ومرتآح ماتبي غير رضى ربها ورضى زوجها

وتكمل نص دينها

تذكرين وانا اخيتس ايام اول المرة اللي يزعل عليها زوجها ما بها خير لا لدينها ولا لزوجها برضى الزوج الجنة

اما الحين البنات تشرط مابي اطبخ وابي شغالة وابي بيت لحآلي ولا وزيادة بعد مهري ابيه القيمة الفلانية والمشكلة السناعة بهالوقت صآرت نادرة

ومهورهن تقص الظهر ماغير تحمل الرجل ديون على ظهرة يصير هالدين هم شايلة على راسه

والزوآج ليا صار أوله مشآكل وهم تعرفين وش بيصير آخره

مير الله يسهل ويسر أمور الزوآج لكل شاب يبي يتزوج ويكمل نص دينه

مير مابوه رجآل آجاويد مثل أول يقص لسان البنت ويقول مهرٍ معقول مو مهر بالسماء طآير

يحسبون الوآحد يعاطس درآهم ماكنهم يعرفون ظروف الوقت

تدرين ابو صآلح وش يقول ؟!!

يقول اللهم أدفع بلى هاالمهور اللي صايرتن بالسماء مثل غلاء البيوت وزيادة

أم أحمد: والمشكلة مايبون بناتهم يعنسن حرآم عليهم هالناس ليش ما يخافون الله بناتهم

أم صالح: الله ييسر ويسهل خليها على الله وانا اخيتس مير الرجال لو يبون بناتهم يتزوجن ماكان خلوا المهور عالية الحين صآر فيه مجآكر بين البنات
من مهرها اغلى ومن حفلة زوآجها احسن واكشخ

ولا بعد ما سكات لي عذر اقبح من فعل

وش نسوي السوق غالي من وين نجهز كل شيء صار الحين غالي ولازم نطلب مهر يكفينا مع هالغلاة اللي صايره

مير مانيب قايلة الله يعسر على اللي يعسر على عيالنا زواجهم

الزوآج يوخيتي لابد منوه هو سنة من سنن الحياة

فيه ستر للبنت والرجل يحصل من يأوى له ويروح له وفيه عفه عن الحرآم يوخيتي الشيطآن حريص على التدمير والفسآد خآصة بهالزمن .

/

\

/

الآن اصبح غلاء المهور موضة بين البنات

ممكن البعض يأيد كلامي والبعض الآخر لا

لكن هذا الوآقع اللي نشوفه بيننا

انا ابغي اعرف الأهآلي ليه مساهمين في غلاء المهور والمشآكل المترتبة على غلاء المهور كثيرة

منها عزوف الشباب عن الزوآج واقبح مشكلة للفتاة العنوسة وكل فتآة تشوفها كابوس موحش بحيآتها

الغريب بالأمر انو الأهالي ما يغون بناتهم يعنسون رغم انهم من المشاركين بهالشيء

يعني إذا صارت البنت ماهي فاهمة الحياة وظروفها يوم انها تبغي مهر غالي تحصل ردع ورفض من الأهل بهالشيء

ليه ماتصير البنت والأهل تحت التفكير الوآقعي انو يخلون المهر يسر

انا ما اقول روح بنتك بكم فلس ولا اللهم صلي وسلم على محمد تحسبها حورية والكل يركض عليها لا تروح عنه

مطقها رآس البنت والأهل

ليش صار الوقت الحالي مافيه ابداً تيسير امور الزوآج بل بالعكس اللي شايفة تعسير امور الزوآج

للأسف الحين صآر الأغلب مو الكل من يعسر امور الزوآج ماهو عارف انو ورى هالتعسير مشآكل عظيمة

مثل البنت ليا البست عباية مخصرة وبرقع وكحلت عيونها وتتمايل بمشيتها ولما يلحقها شاب

قالت انت قليل آدب خاف الله بخوآتك ترين رآح يحصل لهم مثل هالشيء اللي قاعد تسويه ببنات خلق الله

ياني ودي اسطرهن ليا قالن كذا مدري متى يفهمن انو هن اللي باغيآت هالشيء مدري يحسبونا ما نشوف وإلا وش القصة

انا جبت هالطآري ضرب مثآل فقط يعني الأهآلي اللي بناتهم يعنسون يضيق خلقهم على بناتهم ماكنهم هما اللي مشآركين بهالمشكلة وهما اللي باغين هالشيء يصير

سبحآن الله الحآل تغير 180 درجة عن أول كآن الزوآج اول عفة وستر والحين اعتقد انو الصمت ابلغ من الكلام على وصف حآل الزوآج الآن لاني مو محصلة كلمات اوصف بها بصرآحة

والكل نسي وغفل عن حديث الرسول صلى الله عليه وسلم ان ((أكثرهن بركة أيسرهن مؤونة)).

وما انسى اذكر لكم انو البعض من البنات تغلي المهر مشان تشوف هل المتقدم لها يجتهد ويكافح من آجل الحصول عليها

مسويه فيها بتشوف انه رجآل يكافح ظروف الحياة وان كانت قاسية او لا

ويطول الحديث عن هذه القضية السيئة المنتشرة في عصرنا الحآلي

على فكرة >>> اتوقع رآح اتسطر

ليا شبابنا اتزوجوا نساء غير سعوديات سوى سوريات وغيره

لا تجلسون تقولون شبابنا مافيهم خير لبنات ديرتهم انزين انتي لو فيك خير لولد ديرتك مارآح ولد ديرتك يتزوج من برى .

الأسئلة النقاشية:

* هل الأهل لهم دور كبير في غلاء المهور ؟!!

* برأيك ماهي الحلول المناسبة لهذه القضية؟!!

* برأيك ما مدى خطورة هذه القضية على المجتمع ؟!!

*كلمآت تعبر/ي فيها عن نظرتك لهذه القضية بشكل عآم ؟!!

والسموحة منكم على طرحي لهذه القضية باللهجة العامية

لاني افضل العآمية أكثر من الفصحى [ندعوك للتسجيل في المنتدى أو التعريف بنفسك لمعاينة هذه الصورة]

بإنتظآر رأيكم

دمتم بطيب