[ندعوك للتسجيل في المنتدى أو التعريف بنفسك لمعاينة هذه الصورة]مصر فى 70 منظر!! محمد فتحى
* مصر عند المحامى (قضية خسرانة).
* مصر عند السباك (محتاجة جِلدة).
* مصر عند دكتور الأسنان (عايزة الخَلع).
* مصر عند لعيب الكورة (تسلل).
* مصر فى قصص الحب (خاينة).
* مصر فى السيما (فيلم رعب).
* مصر فى الأغانى (لحن مسروق).
* مصر فى التاريخ (قصة انتهت).
* مصر فى الجغرافيا (خريطة ضايعة).
* مصر فى الحساب (ضرب وقسمة).
* مصر عند دكتور النساء والتوليد (ولادة متعثرة وكمان قيصرى).
* مصر عند دكتور الأنف والأذن والحنجرة (لا بتشم ولا بتسمع ولا حتى ليها صوت).
* مصر عند دكتور الرمد (بقت كفيفة).
* مصر فى المسرح (ستارة بتتقفل).
* مصر فى التليفزيون (تششششش).
* مصر فى الروايات (صفحة ضايعة).
* مصر بالنهار (يوم ماطلعتلوش شمس).
* مصر بالليل (ضلمة).
* مصر فى الكمبيوتر (باد سيكتور).
* مصر ع النت (موقع إباحى).
* مصر فى التليفون (مشغولة).
* مصر عند الشعراء (مش موزونة).
* مصر فى المكتبة (مُستعارة).
* مصر فى المترو (عطلانة).
* مصر فى رسايل الدكتوراه (مرجع سابق).
* مصر فى الجامعة (ض.ج).
* مصر عند المقاولين (خازوق).
* مصر فى الكهرباء (سلك عريان).
* مصر فى أى حيطة (خابور).
* مصر فى الإشارة (حمرا).
* مصر فى الجنة (الحور العين).
* مصر فى جهنم (الزبانية).
* مصر فى الشارع (بلاعة مفتوحة).
* مصر فى العربية (شرقانة).
* مصر فى عود القصب (زعزوعة).
* مصر فى الأجزخانة (لُبوس لا بد منه).
* مصر فى ملامحى (لون قمحى وتعويرة).
* مصر فى الصلاة (ساجدة).
* مصر عند النجار (كماشة).
* مصر فى وش ابنى (ابتسامة).
* مصر عند الجزار (دِبيحة).
* مصر فى المواصلات (مزنوقة).
* مصر ع الناصية (بتتعاكس).
* مصر ع القهوة (بتحاسب على مشاريب غيرها).
* مصر فى السوق (فَرشة بتشيلها البلدية).
* مصر فى الصلاة (صف أعوج).
* مصر فى الفرح (رقاصة).
* مصر فى العزاء (ندّابة).
* مصر عند الحزب الوطنى (صندوق انتخابات).
* مصر عند أحزاب المعارضة (تعذيب).
* مصر فى السجن (حبس انفرادى).
* مصر فى الصحافة (مانشيت بايخ).
* مصر بين الصحف (جورنان أصفر).
* مصر فى المطعم (سلاطة).
* مصر على باب الملجأ (لقيطة).
* مصر فى السوبرماركت (صابون سايل).
* مصر فى الفرنة (عيش مسكع).
* مصر فى الفاترينة (مانيكان وحش بإيد واحدة).
* مصر بين الغسيل (مِبقعة).
* مصر عند المكوجى (مِكرمشة).
* مصر بين الأدوية (مُرَّة).
* مصر من البلكونة (واقفة تحت).
* مصر فى الجنينة (شوكة فْ وردة دبلانة).
* مصر فى السيرك (بلياتشو).
* مصر تحت الكوبرى (بتشم كولّة).
* مصر عند الحلاق (مُوطيّة).
* مصر عند الميكانيكى (محتاجة عَفشة).
* مصر فى المدرسة (متذنبة ووشها فى الحيط).
* مصر عند العجلاتى (عايزة النفخ).
* مصر اللى مهما أقول فيها باموت فيها بس هى تحس. مصر اللى ادعى
عليها واكره اللى يقول آمين. مصر اللى فى غرفة الإنعاش محتاجة قُبلة حياة
بس احنا بطلنا نبوس.. على من يجد مصر الاتصال بـ«0900»، وعلى من لا يجدها
أن يسأل عنها المفتش كرومبو قبل أن يتم اعتقاله بتهمة البحث عن بلد تايهة
ومسروقة يا ولاد الحلال.
(ملحوظة: كنت أظن أننى لن أستعين بهذا المقال الذى كتبته فى 2009 ثانية بعد الثورة، لمن يبدو أنه صالح لكل العصور، فشكراً للجميع).
موضوع: مصر فى 70 منظر!! 