بيقولوا جمال مبارك شاب طموح
وانا بقول احنا اللى قتلنا الطموح
وبقينا عايشين جتة من غير روح
وبيقولوا جمال مولود فى المطبخ السياسيى
كلام جميل على عينى و راسى
وانا مولود بأسى
زي كل شباب جيلى وكل اهلى وناسى
وبيقولوا جمال فلتة زمانة
ربنا يخلية ويطرح البركة فية
بس يقولنا بلدنا متأخرة لية
وبيقولوا جمال مواطن مصرى
ومن حقة يبقى رئيس
ومين اللى قال انه مش رئيس
طيب ماهو رئيس ياترى تقدروا تقولوا عملنا اية
وبيقولوا جمال رئيس لجنة سياسيات
وانا بقولهم الشعب المصرى كله
مكتوب اسمه على قوائم الاموات
بيقولوا جمال صاحب حركة شعبية
وثورة فى عالم النهضة والحرية
وفكر ومستقبل جديد
اللى يضحك بيقولوا ان احنا بلد مؤسسات
وعندنا قال اية انتخابات
وصناديق زجاجية
والحمد لله متعبية بكامل الحرية
والانتحابات كلها نزاهة وشفافية
والنسبة فى ايدينا نعملوها تسعة وتمانين
بس علشان العين
بس هية اكتر من كدا بكتير
واسألوا كل مولود من قبل ما يتولد
هيقولوا جمال منقذ البلد ومنقذ البشرية
وتصدق فية ناس بتقول ان جمال مبارك اتظلم
علشان طلع ابن رئيس
لان جمال بيعتبر انه معجزة العصر الحديث
وقائد ثورة التحديث
ومش مهم الشعب يموت فطيس
لكن المهم ان جمال مبارك
يبقى لمصر رئيس
هو احنا نطولوا انسان بسيط
واكتر من بسيط وزيه زينا
وساعات بيدور على شغل معاناوقلبة علينا
و تصدقوا ساعات كمان بيستلف مننا
مين اللى قال ان جمال مبارك مش مننا
دا حالته تعبانة اكتر مننا
دا انت لو قعدت معاة هيقولك على الوجع
هيصعب عليك تصدق شهرين مادفعش ايجار السكن
وعلية كمان قسط تلاجة اتناشر قدم
اوعوا تقولوا انه هيأكل قرش دا راجل جدع
بس انتم عارفين الظروف والزمن
دا الصدق فى قلبة انطبع
اوعوا حد يقول انه حاكم البلد
واوعوا تقولوا ان الوزراء
ورئيسهم وكل رجال الدولة بيشتغلوا عندة
دا كلام كدب وكلة ظلم فى حقة
ودى هو سبب تعبه
دا شاب طيب ومتواضع وبسيط والله العظيم قلبى عندة
وقولوا كمان ان الريس جمال عندة نظرة ثاقبة للامور
وانا الصراحة معرفش يعنى اية ثاقبة
انا عبد المامور
ودة طبعا غير النظرة التطلعية والمستقبلية
ودة كله غير انه شخصية قيادية ومحورية
وعندة دراية كامنة بصغائر الامور
ومفهاش حاجة ابدا لو فصلنا كام مادة
من مواد الدستور هو احنا نطول
ما كله علشان خاطر مصر يا طور
ويكفى ان بيعرف امتى يهدى وامتى يثور
وقالوا كمان ابن الوز عوام
يسلام والله لهم حق هى دى عايزة كلام
ماهى بقت بركة والسلام
جمال مبارك شخصية لم تتكرر
على مر الازمان والعصور
ولو عملنا احصائية منذ بدء التاريخ لحد اليوم
مش هنلاقى منه اتنين
هيجى بعدة فى الترتيب صلاح الدين ومينا موحد القطرين
وابوه طبعا قبلهم الصلاة على الزين
وبس كل اللى علينا اننا نشوفوا كنا فين وبقينا فين
ويكفى ان راعى الرياضة والرياضين
انتم لازم تهتفوا بأسمه وترفعوا صوره وتسبحوا بحمده
انا نفسى اعرف انتم ليه مش فاهمين رحبوا بيه
ويكفى ان شعوب العالم كلها بتحسدنا علية
علشان عندنا واحد زى جمال
الوحيد اللى يقدر يسعدنا
امال انتم مفكرين اية
انتم مش مقدرين النعمة دا لو اى شعب فى العالم
كانوا زمانهم بيبوسوا ايدية ورجليه
والغريب والعجيب ان فية ناس معارضة
انا واحد من الناس نفسى اعرف
الناس بتعارض لية
لازم نحمدوا ربنا ان عندنا جمال بيه
للشاعر عبد الحميد بدوى
موضوع: قالوا عن جمال مبارك 
